瑞典求出線掃黑唔留手

猪拉多纳

歐國盃外圍賽G組賽事，瑞典會喺主場迎戰黑山。瑞典現時喺G組5戰得9分排第2，落後榜首奧地利4分，而俄羅斯則以8分排第3，為咗保住直接出線嘅資格，瑞典餘下嘅賽事絕對不容有失，今仗主場面對近5仗未贏過嘅黑山，相信都唔會留手，阿謙捧讓球主勝。（有線64及203台周一凌晨2時45分直播）

瑞典現時喺G組同奧地利同屬不敗之師，可見兩軍實力接近，排第2只因和波賽事較多，上次作客黑山就畀對手摸和痛失2分，今仗回師主場一定唔會留手。瑞典今仗有伊巴謙莫域壓陣，加上同佢合作無間嘅馬古斯貝治亦在大軍名單，配合施巴斯坦拿臣同莊拿斯奧臣等中後場球員，面對黑山相信主動出擊壓住嚟打。
黑山近5仗未威過

黑山自去年9月贏摩爾多瓦後，已經未再嘗勝利滋味，球隊近5場賽事錄得2和3負嘅劣績，今仗鋒線雖有曼城前鋒祖維迪及FC北京箭頭丹恩奴域掛帥，但中後場只有効力費倫天拿嘅中堅史提芬沙域具頂級聯賽級數，未必能頂得住瑞典神鋒伊巴謙莫域。黑山喺今屆歐國盃外圍賽表現麻麻，作客「魚腩部隊」列支敦士登都贏唔到，今仗造訪志切贏波嘅瑞典應該冇運行，阿謙推介讓球主勝。