法國強陣搶W比你睇

猪拉多纳

2016年歐國盃主辦國法國主場同比利時踢熱身賽，由於法國唔需要踢外圍賽，領隊迪甘斯會比較重視熱身賽，希望測試球隊真正實力，態度肯定認真。反觀比利時將於周末歐國盃外圍賽作客同組勁敵威爾斯，今場「太公波」唔會去盡，加上中場夏薩特剛隨車仔去完泰國同澳洲比賽，舟車勞頓未必上陣，因此簡單要法國主W。

（周一凌晨3時開賽）

法國兩位祖雲達斯球員保羅普巴、艾拉剛踢完歐聯決賽，獲得免役，但陣容仍然強大，包括阿仙奴射手基奧特、馬體會翼鋒基沙文、今季法甲神射手拿卡錫迪，前線火力充足。特別係基沙文今季西甲轟入22球，同尼馬睇齊，僅次於C朗同美斯，狀態弗爆。由於法國係主辦國，明年會直入歐國盃決賽周，領隊迪甘斯應會將熱身賽當成正式比賽對待，令球員保持踢大賽心態，爭勝戰意有保證。
比利時留力砌威爾斯

至於比利時雖然都徵召最強人腳，包括夏薩特、賓迪基、費蘭尼、奇雲迪布尼等猛將，但「戲肉」始終係周末鬥威爾斯嘅外圍賽榜首大戰，領隊韋莫斯今場好大機會大幅度輪玩，以保留體力。比利時防線支柱兼隊長高柏尼缺陣，後防有隱憂，法國贏面較高。