匈牙利巴西半場大駁火

猪拉多纳

今日世青盃3支主攻球隊巴西、德國及匈牙利一齊登場。當中E組榜首大戰匈牙利U20對巴西U20最矚目，「森巴兵團」進攻銳利眾所周知，估唔到匈牙利演出都令人眼前一亮，上仗大炒北韓5比1，初生之犢不畏虎，相信匈牙利小將無懼同巴西火併。入球大熱爆得1.46倍，想好分頭揀2.15倍半場大更好。

（周四下午3時開賽）

匈牙利今屆踢法進取，上仗狂攻北韓全場有17次射門，中場美禾更演帽子戲法，効力德乙RB萊比錫嘅中場蘇特卡爾馬亦有1球進帳。大勝之後一班生牯仔自然心雄，事關一旦贏埋巴西，勢必吸引大球會關注，各小將身價隨時暴漲。
德國小將繼續贏到盡

巴西上仗4比2擊敗尼日利亞，盡顯王者氣勢，巴西喺09及11年都打入決賽取得1冠1亞，但上屆無緣參賽，今屆捲土重來爭標飢渴感更強，力求第6次捧盃，對住匈牙利必定繼續搶攻，兩軍火力都咁猛，半場大唔難。

同時間開波嘅F組另一場比賽，奪標熱門德國U20延續大國腳「贏到盡」作風，上仗大炒斐濟8比1，今輪對烏茲別克U20相信又可以大屠殺。烏茲別克上仗對洪都拉斯都要失4球，遇上火力更強嘅德國邊有得還手，直取德國U20讓球主勝。