皇馬「讓主」有本有利

猪拉多纳

「小豌豆」博留隊-2殺得起

查維亞靴南迪斯經歷過喺曼聯失寵，遠走皇馬但又長坐冷板嘅日子，幸好「小豌豆」把握近來擔正嘅機會頻頻士哥，打出漂亮翻身戰！今晚皇馬主場迎戰中後場唔齊章嘅艾美利亞，「小豌豆」梗係要繼續數胡力爭留「艦」，皇馬-2照捧1.64倍「讓主」。

（now632台周四凌晨2:00直播）

先喺歐聯8強一腳射爆馬體會，再嚟梅開二度助皇馬反勝切爾達，「小豌豆」呢排Keep住開火，Fit爆狀態就連主帥安察洛堤都要賣口乖，話冇可能唔擺佢落「銀河艦隊」正選名單。西班牙傳媒更爆料話，皇馬已經準備好用1,000萬歐元（約8,400萬港元）買斷呢位射手。距離正式登艦只係差幾步，「小豌豆」呢鋪梗係無論如何都要搏埋佢。
5件主力缺陣 艾美利亞或留力

另邊廂當家球星C朗亦冇被搶太多風頭，近日獲前曼聯領隊費格遜力撐，讚佢無論踢米禾爾定唐卡士打呢啲低組別球隊，照樣可以瘋狂士哥，暗示佢比只可以喺巴塞發威嘅美斯更全面。咁大頂高帽笠落嚟，C朗邊可以唔數胡回應恩師吖！就算守將沙治奧拉莫斯、丹尼爾卡華積一齊停賽，皇馬都夠晒本錢開殺戒。

艾美利亞家陣仲要為護級頭痛，有幾多斤両大家心照，佢哋今仗仲有中場威靈頓施華、守將米高馬些度等5件主力缺陣，憑咩頂到「銀河艦隊」先？艾美利亞下仗會喺主場鬥踢緊風流波嘅切爾達，留番啲力喺嗰場搶分好過啦！