荷蘭細取土耳其

猪拉多纳

尹佩斯洛賓休戰炒唔起

歐國盃A組外圍賽，荷蘭主場迎戰土耳其，荷蘭今屆已經先後輸畀捷克及冰島，想爭頭兩名直接出線不容再失，不過橙色軍團今仗缺少尹佩斯、洛賓兩大主力射手，恐對入球能力有一定影響，兩軍近年交手入球數字偏低，如嫌1.42倍賠率太熱，不妨改捧細。

（有線61及201台周日凌晨3時45分直播）

曾被譽為「外圍賽之王」嘅荷蘭今屆表現失準，踢完頭4輪分組賽已經輸咗2場，現時失分畀捷克、冰島還要多，如果要爭上前兩名取得直接出線權，面對同組其餘四隊更加不容再失。荷蘭近5次國際賽面對土耳其取得3勝2和，包括上屆世盃外圍賽主客雙殺對手，整體實力應比對手優勝，今仗唯一隱憂係兩大射手尹佩斯、洛賓因傷缺陣，兩人對上兩輪分組賽合共攻入4球，或多或少會對進攻有影響。首度入選國家隊嘅禾夫斯堡前鋒巴斯杜斯狀態係唔錯，但佢同亨特拉爾基本上屬同一類型前鋒，要有足夠供應才有機會發揮。
土耳其話明縮住踢

荷蘭對上3次擊敗土耳其，比分唔係「1:0」就係「2:0」，入波都係一球起、兩球止，如以中位數2.5球計，雙方最近6次於國際賽交手亦全部開細。土耳其今屆兩場作客外圍賽都贏唔到，除咗淨吞冰島3蛋之外，面對實力平平嘅拉脫維亞都只係踢成1比1，難怪領隊泰林賽前表示今場會先做好防守，唔會過分搶攻，以荷蘭現時鋒力想撕破密集防線亦唔易，捧入球細比主W更划算。