錫菲聯鋒力曳 斯肯索普勝在夠氣「細」

猪拉多纳

愈踢愈沉嘅斯肯索普經已響起降班警號，再唔發力下季英乙見真係唔出奇。佢哋呢鋪要作客近況回升嘅錫菲聯，要搶分一啲都唔易，之不過領隊馬克羅賓斯賽前開到聲警告班球員，相信班波唔會咁易投降，一人跑多一步，錫菲聯想入多幾粒都唔係易，吼1.77倍入球細。

（開賽時間：周三凌晨3:45）

斯肯索普最近作客成績勁曳，已經連續5場作客唔識贏，相信佢哋今仗都唔會失驚無神擺大個頭搶攻，實行守足全場博1分好過。況且季尾波至講鬥志，斯肯索普依家只係領先排尾4嘅克魯1分，唔想跌落降班區班波今仗實要搏，何況領隊馬克羅賓斯都警告班球員要生生性性踢好波，就算今仗真係搶唔到分，都唔似會輸鑊甘。
錫菲聯射手啞火

另邊廂錫菲聯早前經歷2連敗後，近3仗取得1勝2和成績。雖然話表現有起色，但要留意哋近6仗所入嗰6粒當中，有2球都係屬於12碼，反映鋒力冇想像中咁堅。尤其兩大射手占美梅菲同米克麥紐迪最近齊齊啞火，今仗唔似炒得起人囉！