曼城巴塞巨星大匯演

猪拉多纳

上星期由年廿九一直睇波睇到年初四，小休一日，今晚開始，又嚟過另一Round新春睇波大派對啦！今晚歐聯16強重頭戲當然係曼城對巴塞隆拿啦，我就好期待睇阿古路同美斯呢對阿根廷好兄弟對決嘞。佢哋兩個係當今球壇5大最佳前鋒之一，賽前都好Pro咁講明會將友誼放埋一邊，比賽行先。既然兩軍都咁猛火，一於嚟個「巨星大匯演」，博1.72倍入球大啦！

阿古路同美斯由細玩到大，「阿Kun」上星期放假仲特登走去探美斯添！不過Friend還Friend，阿古路賽前都「先小人後君子」：「曼城投入好大資源去爭歐聯，今場波非常重要，尤其係要同美斯交手！不過落到場，友誼只會排第二。」阿古路今屆踢5場歐聯分組賽入5球，美斯就仲勁啲，6場入8球，既然大家都係「超級效率王」，今場波可能會變成佢哋兩個嘅「士哥」大戰！
大衞施華 拿斯尼 側擊做奇兵

同時，曼城領隊比歷連尼喺西甲打滾咁多年，對應付巴塞戰術有豐富經驗，坐波監嘅中場耶耶托尼更加係前巴塞球員，唔多唔少都收到啲風。曼城吸收咗上季歐聯16強兩回合都輸畀巴塞嘅經驗，今場波應該會有針對性部署，新加盟嘅射手韋菲特邦尼體力雄渾兼制空力強，佢呢類正正係巴塞防線最驚面對嘅前鋒，配合兩翼大衞施華同拿斯尼側擊，隨時偷到巴塞雞都唔奇！
巴塞MSN鋒線 全球最恐怖！

講起巴塞，當然唔可以唔提尼馬同蘇亞雷斯兩大殺手啦！事實上，美斯加埋佢兩個所組成嘅MSN組合，近期火力全開，月中贏利雲特5:0嗰場波，就係佢哋3個包辦晒5個入球！只要呢條鋒線撻着，絕對稱得上係「全球No.1」，呢場波就算同曼城鬥攻都未驚過啦！
曼城歐聯主場全開半大

‧曼城今屆歐聯主場出擊開晒「半場大」。

‧巴塞近4場歐聯都係開「入球雙」。

‧美斯近3場歐聯客戰勁入6球。
盤路解碼

上屆歐聯16強對賽，兩回合「首球」都係美斯。
歐聯16強賽制

採主客兩回合制，今輪為首回合。兩回合計打和，計算作客入球優惠，未分勝負則於次回合法定時間後加時30分鐘，加時階段仍計作客入球優惠，再和則互射12碼決勝。
頂占筍盤：曼城（入球大）