伯明翰hea踢歎細界

猪拉多纳

伯明翰同米杜士堡，相信大家都記得呢兩支球隊好幾年前仲踢緊英超，但跌落英冠後繼續浮浮沉沉，伯明翰上季仲衰到要護級，爭啲今季會喺英甲見。米杜士堡開始行運，搵到個有料教頭卡蘭卡，今季有望攞到升班資格，不過球隊三日前先踢完英格蘭足總盃，話咁快就要喺聯賽作客伯明翰，對球員體力真係一大挑戰，今場阿King建議捧入球細。

（周四凌晨3時45分開賽）

伯明翰上季憑住較佳得失球，得以保住英冠席位，但今季季初仍然唔知死，繼續踢得亂七八糟，搞到徘徊喺降班區，更試過對般尼茅夫慘吞八蛋，創出139年隊史主場最大敗仗。球會高層即刻搵名宿羅維特返嚟做雷霆救兵，呢位後衞出身嘅領隊接手後即改善球隊脆弱嘅防守，成績穩步上揚，依家排喺中游位置，不過正正係因為球隊高不成低不就，球員冇乜心機踢，防守雖然已冇大問題，但攻力始終疲弱，近四場只入得一球，今場對住防守穩陣嘅米堡，睇怕都係入唔到波。
巴拉福特未回氣要反

周四凌晨仲有一場英甲獨腳戲，奧連特主場對巴拉福特，同米堡一樣，巴拉福特都係啱啱踢完英足盃，球員可能未回得切氣，今場作客讓唔起對手，奧連特受讓值得捧場！最尾講多場南美自由盃分組賽，由哥連泰斯主場迎戰聖保羅，聖保羅有進攻好手阿祖安辛杜利安坐波監，星級中場卡卡又借用期滿返咗去奧蘭多城，攻力受削，今場不妨捧細。