國足新仔強戰澳洲

猪拉多纳

展現「大」無畏 下風都照砌

亞洲盃8強戰今日開打，重頭戲喺晒下線，分組賽表現一鳴驚人嘅中國挑戰東道主澳洲，中國一班新生代喺今屆賽事強勢爆發，進攻線予人眼前一亮，今仗再度被睇淡，喺全無壓力下，決心以大無畏精神，同實力高一皮嘅澳洲駁火。雖然黑柴仍然睇好澳洲可以藉主場之利贏波，但淘汰賽階段讓到一球略嫌多，不如撐有2.29倍大盤好過。

（now 671周四晚上6時30分直播）
卡希爾抖足搏殺

今屆亞洲盃首次喺大洋洲舉行，經過24場分組賽，竟然冇出現過一場和波，而更巧合嘅係，8強中4支踢法保守嘅沉悶球隊南韓、烏茲別克、伊朗同伊拉克都同處上線；相反澳洲、中國、日本同阿聯酋四支踢法進取可觀性高嘅球隊就齊集下線，即係去到決賽之前，都係主攻對主攻，主守對主守。

澳洲喺分組賽最後一戰不敵南韓，淪為次名出線，除咗今仗要對分組賽全勝嘅中國外，一旦過關殺入4強，就好大機會要硬撼爭霸頭號大敵日本，條線認真唔易踢，雖然領隊普斯迪高路話想攞冠軍就預咗要贏晒所有強敵，但兩大攻擊手卡希爾同羅比古斯，對佢上仗想留力淘汰賽，只畀兩人喺70分鐘後至落場，搞到輸畀南韓有啲不滿。無論如何，兩大攻擊手已經蓄銳等今仗，加上隊長兼中場大將積甸拿克復出，中前場戰鬥力回復完整，面對中國肯定主攻，只係主力中堅史柏拉洛域累積兩面黃牌要停賽，而且佢哋較緩慢嘅防線喺分組賽面對快速反擊經常出現甩漏，今晚面對大無畏嘅國足，唔容易保持不失。
靠中場3小將食胡

中國今屆倚重新人，喺法國籍領隊比連帶領下踢得極具活力，尤其前線3名進攻中場孫可、武磊同蒿俊閔都充滿創造性同侵略性，呢班年輕球員踢出國足多年未見嘅快速組織同反擊，雖然國足防線同樣唔算穩陣，尤其後防大將張琳芃缺練幾日，今仗就算踢得都冇十足狀態，好難抵禦澳洲前線全方位進襲。今仗預期係對攻格局，大盤有好分頭，值得一博。