日本強勢追擊伊拉克

猪拉多纳

賀遠藤保仁第150戰

亞洲盃第二輪分組賽今午上演Ｄ組賽事，壓軸戲兩支出線熱門伊拉克與日本交鋒，日本首輪表現理想，球隊上下賽前聲稱今仗會全力以赴，計實力同狀態都高伊拉克兩班，推介2.05倍讓球客勝。

（now 671周五下午5時直播）

日本首仗四球大炒巴勒斯坦，新帥艾古爾嘅433主攻陣式威力盡顯，若非下半場大比數領先後拖慢節奏，有力贏得更多，球隊上下都視伊拉克為同組最強對手，決心贏埋今仗確保出線至畀主力休息。中場大將香川真司上仗交出兩個助攻，賽前揚言希望喺今場開齋，不過今仗主角肯定係將於本月28日年滿35歲嘅老將遠藤保仁，第150次代表國家隊上陣，除咗係日本史上代表國家隊次數最多球員，亦將會追平德國名將馬圖斯紀錄，不過佢話自己仲有心有力，希望將來有機會打破埃及名宿艾哈邁德哈桑代表國家隊184次嘅世界紀錄。

伊拉克正處於新舊交替期，首仗面對實力平庸嘅約旦表現亦一無是處，直至下半場尾段至靠耶沙卡斯米一個幸運入球險勝，目前戰鬥力根本冇得同日本揮。
巴勒斯坦讓主博得過

至於頭場巴勒斯坦對約旦（now 671周五下午3時直播），客Ｗ熱到得1.28倍簡直過分，約旦近11場國際賽未贏過，近期更錄得6連敗，合共只入一球，上仗同伊拉克合演完一場低水準賽事後更傳來噩耗，除咗守將莫達斯耶仙停賽外，前線領袖10號仔阿密特希耶賽後因脫水搞到排尿困難，經過四小時都無法完成藥檢，面臨亞洲足協處分，今仗肯定缺陣，球隊攻守實力進一步削弱；巴勒斯坦首度參加亞洲盃，上仗面對超班嘅日本大敗意料中事，但球隊半場落後三球都冇洩氣，下半場踢得相當硬淨，呢班波近一年嚟進步明顯，今仗雖然都有後衞阿密特哈比停賽，但面對冇牙約旦絕對有得砌，讓球主勝有3.1倍好分頭值得一博。