卡塔爾僱傭兵冇料頂唔住伊朗

猪拉多纳

亞洲盃C組第2輪賽事上演中東大戰，卡塔爾喺悉尼對伊朗，恐怕又要輸，事關卡塔爾最有戰鬥力嘅「僱傭兵團」已經式微，就連王牌射手蘇尼亞都冇入選，對家教頭奎羅斯近日大聲疾呼話伊朗足球受到政治問題打壓，相信會打爭氣波開1.58倍W。

（now671台周四下午5:00直播）

以往卡塔爾由歸化球員孭飛，除咗最有殺傷力嘅烏拉圭射手蘇尼亞，仲有唔少巴西球員撐場，不過近年已經搵唔到高質素「外援」，陣中嘅所謂歸化球員，集中喺非洲同其他中東國家出生，睇落只係揀無可揀嘅選擇，首戰先開紀錄下以1:4慘負阿聯酋，證明牌面真係唔夠班。
捧完海灣盃例冇運行

仲有呀，對上兩屆海灣盃冠軍嘅球隊轉戰亞洲盃都冇好下場，好似07年嘅阿聯酋分組賽出局、11年嘅科威特更加3戰全敗玩完，簡直中咒咁款，勁邪，所以話卡塔爾兩個月前拎完海灣盃冠軍，都未必有運行，反而可能會變成佢哋急於求勝嘅負擔添，旨意佢哋經歷大敗後反彈，真係唔係咁容易。

伊朗首戰以2:0解決巴林，星級球員包括高查尼赫特、迪查加、索查同尼古納姆全部打正選，索查仲有波入，執教過皇家馬德里嘅教練奎羅斯更加話，伊朗因為政治問題導致足球發展被打壓，例如國際足協仲未發放巴西世盃800萬美元嘅出場費，嚴重影響佢哋備戰，成肚火梗要添食啦！

亞洲盃C組