煲慣魚生粥！賓菲加「讓球和」有回布

猪拉多纳

賓菲加喺今屆歐聯分組賽出局，就連降格踢歐霸盃嘅資格都冇，好在佢哋一返到國內就變成「惡霸」，今晚葡萄牙盃16強迎戰「私房菜」布拉加，贏波晉級機會都唔細，可惜主勝略欠分頭，照佢哋過往煲魚生粥嘅習慣，今場一於揀3.25倍「讓球和」。 （有線155周五凌晨4:00直播）

賓菲加上場葡超作客擊敗宿敵波圖之後，進一步鞏固榜首位置不特止，攻守數據更冠絕同儕，其中箭頭洛迪高利馬狀態弗到漏，近3場斬獲3球，火力夠晒保證。但咪以為賓菲加火力猛就會去到盡，事關佢哋近8次主場鬥布拉加雖然取得7勝1和，往積贏晒，不過7場贏波有6場僅以1球差距勝出，今場再煲魚生粥絕對唔奇。

布拉加主力狀態麻麻

另邊廂，布拉加近期走勢不俗，弊在賽前傳出不利消息，拉法施華、拜安奴、馬菲奧斯利馬幾名中後場主將由於狀態問題或先任後備，左閘泰亞高高美斯肌肉受傷唔踢得，教頭沙治奧干斯卡奧今場想排個靚陣都幾難，加上首席射手艾達盧比斯表現啞火，已經連續5場食白果，今場造訪光明球場輸波出局機會大。
葡盃16強