尼馬發火 巴西打爆土耳其

猪拉多纳

踢巴塞 成日被換走激親！

今晚國際熱身賽戲碼唔弱，土耳其喺主場對巴西，好難頂得住唔輸，皆因土耳其有超多外流球員缺陣，即使巴西冇徵召最強陣容出戰，依然有本錢開1.58倍W，特別係尼馬話，近排畀巴塞隆拿教頭安歷基成日換走佢激親，呢場佢擔正，唔憂冇入波呀！

（TVB301周四凌晨2:30直播）

相比起上個月喺歐國外以1:1打和拉脫維亞，其實今次土耳其陣容已經似樣啲，起碼有聖伊天射手艾丁重新入選，但佢哋近排似乎玩緊改革，依家喺德甲搵食嘅中場紐尼沙軒、沙拉亞、卡漢奧奴同後衞奧馬托柏克依然冇被徵召，簡直好似抵制歐洲外流球員咁。加埋費倫巴治中場安利唔踢得，隊長都冇埋點搞呀？
土耳其「排外」德甲群星冇入選

巴西同樣試緊陣，以往嘅主力包括射手侯克、中場拉美利斯、荷西保連奴、右閘丹尼爾同中堅丹迪全部冇入選，世盃後獲重召嘅卡卡今次又冇份踢，唔知係咪被傳偷食搞到離婚嘅事件影響。不過咁，其實鄧加重返「森巴兵團」後熱身賽4戰全勝，證明佢嘅贏波至上主義，絕對適合執教依家嘅巴西，唔使愁喎！

仲有呀，新球王尼馬喺世盃受傷後，復出後簡直「升咗兩個呢」，無論喺巴塞抑或國家隊都瘋狂入波。不過西班牙傳媒發現，今季尼馬為巴塞上陣13次，11次正選落場有6次被調走，雖然佢把口話會服從教練安歷基決定，但就講明每場都想踢足90分鐘，儲埋啲火今場啱使啦！
巴西盧卡斯退隊 急Call賓菲加新仔

唔只咁，最近尼馬得到愛情滋潤，緋聞新女友索到爆，心情靚入波都易啲啦！作為佢前輩嘅羅馬里奧更加話，尼馬打破球王比利嘅國際賽入球紀錄，只係時間問題。至於中場盧卡斯洛迪古斯因傷退隊，搞到賓菲加嘅新仔安達臣泰列斯卡收到急Call後，要臨時取消跟巴西國奧遠征中國歸隊，安達臣泰列斯卡今季喺葡超入8球，隨時帶挈大家收錢呀！
尼馬國家隊全紀錄

58場上陣次數 40球入球

右腳31球

左腳7球

頭槌2球

22次 助攻

1球平均所需時間 125 分鐘

47.32% 國家隊製造入球比率

自首度亮相「森巴兵團」後入波連助攻62球，

期間國家隊總入球為131球。

4,972 分鐘 總上陣時間
尼馬自2010年8月首次入選國家隊後

65場巴西比賽場數

7場尼馬缺席

58場尼馬上陣
Data King：土耳其半場慣食白果

‧土耳其近5次對賽得3勝2和。

‧土耳其近6場得1次上半場有波入。

‧教頭鄧加重新上任後，巴西連續4場開半場細。

‧巴西連續3場半場領先1:0。
乜都玩錦囊：鄧加保守再追半場細

巴西喺鄧加重新上任後，踢法比史高拉利時更加保守！冇計啦，鄧加球員時代踢防中出身，唔識教進攻都好正常，最重要係佢重掌國家隊後，最近巴西已連開4場半場入球細，假如大家怕佢哋陣容不整W唔出，玩1.48倍半場細都係唔錯選擇。