祖記讓唔起奧林比亞高斯

猪拉多纳

啱啱過去嘅英超曼市打吡備受矚目，大戶梗係唔執輸喇，與普遍睇好呢場會合演入球騷唔同，佢哋一早買定細盤，去到上半場曼聯後衞基斯史摩寧兩黃一紅被逐後，當時曼城要讓一球，大戶照買入紅魔下盤，最終曼城僅勝1比0只能走盤，但個入球細就袋袋平安。今晚歐聯A組意甲班霸祖雲達斯主場迎戰希臘二哥奧林比亞高斯，「斑馬兵團」因名氣較響而讓得太辣，小心有詐。

（有線62及202台周三凌晨3時45分直播）

祖雲達斯近年喺意甲一枝獨秀，無論係戰績（聯賽三連霸）及吸金力都冠絕「靴國」，於國內難逢敵手，因此每次開盤都讓得辣亦屬合理。

不過，嚟到歐聯場合就唔係咁講，始終歐洲各大聯賽臥虎藏龍，大家都想喺呢個「金礦」掘得幾多得幾多，假如你冇做足功課的話，隨時陰溝裏翻船，上屆喺分組賽末仗打和便出線嘅「斑馬兵團」，喺有輕敵之嫌下輸畀加拉塔沙雷出局付上沉重代價。
名牌效應不宜高估

雖然祖記喺今屆A組3戰贏1場僅得3分，上仗作客更一球不敵奧林比亞高斯，今晚返主場再鬥呢支希臘勁旅，實在不容再失，但佢哋要讓到球半咁多，純粹係名牌效應，況且奧林比亞高斯唔係善男信女，祖記好難像喺國內聯賽般予取予攜，肥叔覺得「斑馬兵團」就算贏波頂盡小勝，呢場都係捧番下盤。