泰國伊拉克玩大佢

猪拉多纳

睇南北韓大戰之前，大家可以睇住亞運男足季軍戰先，由泰國對伊拉克，雖然呢場波激烈程度唔及決賽，但娛樂性搭夠，球迷有望睇到一場精彩入球騷！兩軍攻力不俗，加上季軍戰一向意義不大，雙方球員冇晒心理包袱，會踢得更放，今場入球大值得捧場。

（有線61及201台周四下午4時直播）
冇晒包袱火力更猛

伊拉克同泰國喺今屆亞運晉級過程皆贏得輕鬆，伊拉克頭5場共入17粒，每場都入3球或以上，攻擊球員狀態托弗，泰國頭5場贏波之餘更係一球不失，可惜兩隊均喺4強戰分別不敵北韓同南韓，其中以伊拉克最慘情，加時0比1輸畀北韓。喺足球場上，攞唔到冠軍就係失敗者，季軍對球員嚟講冇乜意義，壓力當然冇4強戰咁大，雙方均可放開懷抱比賽，解釋咗點解季軍戰成日都開大盤。

嗱，伊拉克有老將尤尼斯領軍，又有翼鋒阿里阿丹孭飛，攻力唔需要擔心，咁泰國呢？其實泰國足球近年進步神速，今屆亞運亦踢出隊形，着重地面組織，射手卡拉桑更有5球士哥，同伊拉克鬥攻？未驚過囉！入球大咪走雞呀！