些路迪山寨充名牌

猪拉多纳

正所謂有競爭先至有進步，無論商場或球場都一樣，自從格拉斯哥流浪因財政問題降班後，些路迪喺蘇超難逢敵手，令會方缺乏動力投入資金增強實力，表面上喺聯賽仍然也文也武，但出戰歐洲賽即現形。歐聯附加賽首回合，些路迪作客仲要讓斯洛文尼亞球隊馬里博爾平半，全因「名牌效應」受到高估，可趁機揀選下盤。

（有線64及203台周四凌晨2時45分直播）

現今球壇係一場金錢遊戲，想喺高水平賽事歐聯獲佳績，更加需要大灑金錢增兵。些路迪似乎冇呢方面打算，好大程度上因為喺聯賽獨大，冇增兵迫切性。佢哋現時拍埋歐洲賽三四線球隊都冇優勢可言。上圈對波蘭球隊歷基亞，兩回合合計竟然輸1比6，如非對手次回合因誤用違規球員，被改判輸0比3，些路迪根本早已被淘汰。
馬里博爾受讓有計

實際上，些路迪未夠班踢附加賽，即使「晉級」，前路亦難行。馬里博爾已連續三屆出戰附加賽，開始累積到經驗，遇上「偽名牌」些路迪，有力坐和望贏。另一場俄超勁旅辛尼特今季表現搶鏡，而且屬於歐聯常客，睇好佢哋出線，作客讓比利時球隊標準列治平半，上盤博得過。

（有線62及202台周四凌晨2時45分直播）