漢堡增兵「升呢」夠炒科特布斯

猪拉多纳

德甲球隊漢堡上季表現曳爆，搞到要打護級附加賽，今季佢哋痛定思痛，購入幾名球員加強實力，希望重返前列席位。今晚佢哋將會喺德盃作客丙組球隊科特布斯，正好攞嚟試陣練兵。呢場波漢堡小讓一球，一於撐2.7倍嘅「讓球客勝」o架！（翡翠台周二凌晨0:30直播）
新舊磨合搵丙組仔試陣

漢堡今夏由拿玻里購入中場比哈美，呢位瑞士國腳打法機動又硬朗，令到球隊中場防守力增加唔少。佢哋仲羅致埋緬恩斯翼鋒尼古拉梅拿，同奧格斯堡左閘奧斯特蘇歷，整體實力全面「升呢」。比哈美同尼古拉梅拿上仗熱身賽對艾福特都有上陣，後者仲有「士哥」添。相信呢3位新兵今晚都會落場同新隊友磨合，希望擦出更多火花。

佢哋喺德甲揭幕戰將會作客科隆，今場對科特布斯可以用嚟做最後調整。雖然漢堡未必去到盡，但係要擊敗對手同保持「清白之身」應該唔難，「讓客」捧得過！

德盃賽制：今輪為第1圈賽事，若法定時間打和將加時30分鐘，未分勝負即互射12碼決勝。