AC奧林比亞高斯開大騷

猪拉多纳

國際冠軍盃聽朝殺到埋身！今屆賽事戲碼勁吸引，皇馬、曼聯、曼城、米蘭雙雄等歐洲重量級班霸齊齊參戰。聽朝就由AC米蘭喺多倫多BMO球場，迎戰同屬B組嘅奧林比亞高斯，1.75倍入球大諗得過。

（有線61、201周五早上8:00直播）
柏仙尼 艾沙拉維合作攻堅火力猛

AC上季衰到喺意甲攞第8緣盡歐洲賽，今季搵嚟傳奇前鋒恩沙基領軍，擺明要重振聲威。佢哋亦好快簽入PSG翼鋒文尼斯、中堅阿歷士洛里高同借將阿爾拉米。冗員前鋒馬特尼、中場洛斯連奴全部被借走，「紅黑兵」來季陣容基本上已經確定晒。

雖然羅賓奴傾緊轉會冇隨隊，但大家又唔使擔心AC鋒力。前鋒柏仙尼、艾沙拉維踢得唔在講，中場本田圭佑、安德列普利亦可上陣校炮，新兵阿歷士洛里高處理罰球都有一手，三線具備入球板斧唔使愁冇波入。咪忘記恩沙基之前做過AC青年軍教練，今次佢都帶埋唔少明日之星參戰，彈出一、兩件奇兵有乜咁出奇？

奧林比亞高斯一對箭頭美度古、沙維奧拿有名氣有射術，足夠威脅AC大門攞到入波。加上佢哋係首次參加呢項賽事，梗係唔想玩死守趕客，點都要爭取「士哥」，留番個好印象畀球迷方便拓展美國市場，一場入球騷睇怕走唔甩。