阿根廷三叉戟轟斯洛文尼亞

猪拉多纳

阿根廷今晚主場對斯洛文尼亞。阿根廷剛喺熱身賽輕取千里達，但美斯該仗冇波入，今仗勢必更積極爭取入球，配合上仗休戰嘅阿古路及希古恩攻堅，有望喺出征巴西世界盃前贏波壯行色，阿謙睇好阿根廷今仗可輕取對手，捧讓球主勝。

（TVB302周日凌晨2時45分直播）
阿古路希古恩拍美斯

阿根廷喺上仗對千里達嘅熱身賽收起咗阿古路同希古恩，前線由美斯配合柏拉斯奧及拿維斯攻堅，結果憑柏拉斯奧、馬斯真蘭奴及後備上陣嘅麥斯洛迪古斯各建一功贏3比0。不過，柏拉斯奧同中堅迪米捷利斯喺呢場波受傷，大有機會缺陣今晚對斯洛文尼亞嘅賽事，主帥沙比拿被迫要變陣出擊，上仗冇出場嘅阿古路同希古恩今仗應會正選上陣，同美斯合作組成三叉戟，相信可以輕易喺斯洛文尼亞身上取得入球。

阿根廷今場約戰斯洛文尼亞，某程度上係希望藉同斯洛文尼亞交手熟習同組對手波斯尼亞嘅踢法。斯洛文尼亞陣中最出名嘅球員係効力意甲國際米蘭嘅門將漢丹洛域及費倫天拿嘅翼鋒伊利錫，球隊近期亦頻頻同世界盃決賽周參戰隊伍「拍跳」，但出嚟嘅成績認真麻麻，先後輸畀烏拉圭同阿爾及利亞，今仗作客面對實力比前兩隊更強嘅阿根廷，阿謙認為佢哋好難交出好成績，阿根廷主場要贏兩球或以上難度不大，捧讓球主勝。