杜拜夜機趕返 韋達巫斯義有晒計

猪拉多纳

　　今日田草10場比賽，可能天雨路滑，場地一受到影響，就係冷門馬嘅引爆器，到時唔知會爆成點樣，正如同文棟哥所言，搏命唔係搵呢啲時候，大家投X時小心為上。

　　因為有幾位騎師出外遠征，其中韋達及巫斯義因為跑埋杜拜世界盃，趕搭夜機都只係跑到第八至十場。

　　佢兩位老哥唔係等錢開飯，跑少一日半日影響唔大，一把年紀仲肯趕頭趕命返嚟，唔係有計，唔通係「裝假狗」，慌死我哋馬迷唔信，專登返嚟輸啲熱門。

　　隨時包辦三寶

　　照道理，佢兩個應該唔會立壞心腸，都係想啲好馬唔會落入其他騎師手上，免得肥水流向別人田。講句老實話，以佢兩個八至十場嘅坐騎實力，包辦三寶都唔係冇可能。

　　韋達今日騎兩件，「陽明星星」及「華麗登場」一對馬成績向來好穩定；阿巫騎足3場，咁啱「雄心巨龍」、「朋友仔」及「邦之星」都係新勝，冇可能隻隻贏完收兵啩？所以話呢，佢哋手執呢批子彈，點捨得唔趕返。Jack