大腦派路復出祖記摧殘紫百合

猪拉多纳

歐霸其中一場嚟自「意甲內訌」，由祖雲達斯對費倫天拿，上周「斑馬兵團」喺主場聯賽先小勝對手1:0，並將主場連勝紀錄增至10場，加上有中場大腦派路復出擔正，要贏多次絕對冇問題，一於撐1.92倍嘅「讓球主勝」！

（有線64及203周五凌晨4:05直播）
主場強勢10連勝

上場聯賽「斑馬兵團」對費倫天拿，個陣唔齊都贏到，今場仲要有上場停賽嘅派路復出，中場創造力即時提升。祖記大部分球員都可以候命，只係前鋒胡仙歷同柏比肯定掛免戰牌，至於射手泰維斯就因為膝蓋有啲輕傷，未知踢唔踢得。不過，有洛蘭迪同奧斯華度都已經夠砌，加上中場幾位球員，好似維達爾同保羅普巴等人都入到波，挾住主場10連勝嘅強勢，要贏「紫百合」唔使靠泰仔一個。

另邊廂，費倫天拿近況認真麻麻，已經連續4場贏唔到。雖然射手基奧斯比羅斯就快復出，但相信今場仲未出得住，最慘係後防要員史堤芬沙域又打柴，要反彈似乎未係時候。