偉寶之星 徐雨石復仇成功

猪拉多纳

尋日有多位練馬師飛咗去新西蘭出席拍賣會，不過倉主唔喺香港，並唔代表馬房攻勢會放慢腳步，當中徐雨石、蘇保羅、告達理、蘇偉賢好似夾埋一齊搖控連環出擊，早段場次就有「偉寶之星」、「金碧陽光」、「馬來之珍」同「開心駕到」贏馬。「偉寶之星」上場喺四班泥地千二米，僅僅輸畀「齊飛」奪亞軍，今次兩駒再度對壘，結果「偉寶之星」喺莫雷拉出色發揮下，終復仇成功，輕勝「飛霹靂」個多馬位而回，繼「盤滿鉢滿」、「大把世界」同「神奇飛龍」之後，徐雨石連續四場賽事同莫雷拉合作贏晒，認真合拍。
       
偉寶之星加個防沙眼罩成功補中，徐雨石部署巧妙。
加防沙眼罩一針見效

「偉寶之星」馬主賴建國尋日帶同兒孫入場，一家人齊齊影頭馬相，佢表示賽前好大信心愛駒可以勝出，皆因上次落敗只因馬匹被泥頭打中影響發揮，所以今仗決定加戴防沙眼罩，果然一針見效。