12月田戰例有馬贏 蔡約翰「輕」奏凱歌

猪拉多纳

　　蔡約翰今季銳意爭冠軍，一早已經發力，費事好似上季咁，去到季尾先至有差池，經過十一月猛烈攻勢、十二月沙田賽期次次有馬贏，未過新年已經有29場頭馬落袋，數目驚人，神仙即係神仙，真係把炮。

　　今季蔡神仙用人方面唔同，再唔係倚賴韋達，莫雷拉未之前，已經用開田泰安、安國倫及杜利萊，只係雷神殺到之後，漸漸多合作，進一步分薄韋達主要地盤。

　　呢次蔡出馬唔多，只係得7匹，除第二場用李寶利，唔係慣用殺手，餘駒唔係雷神，就係田安杜三人，睇重兵係呢幾匹，依阿Jack意見，都係捧近期表現好安心。

　　第八場「輕彈錢笑」，前仗贏到冇對手，輕輕鬆鬆贏3個幾身位，估唔到上次再跑，輸到要用放大鏡先至搵得到，呢次加程及換人，都係想拼個明白。

　　紅衣巨龍榮耀假日對碰W

　　第十場兩駒「紅衣巨龍」及「榮耀假日」，唔知邊匹係主力，費事捉錯路，不如買對碰W及鴛鴦Q。(Jack)