苗雷合作必勝多

猪拉多纳

　　近兩日天陰陰，仲久唔久灑幾滴雨，唔排除今日繼續落雨，希望唔好行雷閃電，費事影響到比賽安全。但係落雨濕濕，個別騎師特別錫身，所以，買馬除講馬匹實力，騎師係咪擅長雨中作賽，亦係重要考慮因素，買個錫身，唔使旨意會全力以赴。

　　講開行雷，今季好多練馬師都好鍾意「雷」，莫雷拉喎，貴為「雷神」，已經成為新一代贏馬機器icon，至今期期有馬贏，呢條鋼纜仲未斷，真係唔到我唔寫個「服」字。

　　數到最鍾意同「雷神」合作，除蔡神仙，就係苗禮德，咪睇阿蔡好似關照莫雷拉贏馬多，其實計算呢兩個馬房供應量，大家數目一樣係16匹，而雷神跑阿苗馬，多數有貨交，唔係話，邊得成績咁好，已經交出3冠4亞2季。

　　今次阿苗有兩匹馬交畀莫雷拉，第五場「必勝多」，呢年綵衣同主有「喜勝多」，鬥志好到極，呢匹新馬秉承到鮮明作風，跑到第2仗差贏到，上次輸少少畀強敵「勝利攻略」，再跑有力補中。

　　第六場「好事必得」剛在1400米獲亞，唔再淨係跑短途，成績可望有突破，梗要再捧。Jack