大摩提供6駒貝湯美十足主帥

猪拉多纳

　　今日係國際賽大日子，總會令人聯想到大摩，無他嘅，大摩最鍾意吼實高班賽，身為盃王嘅佢，冇理由唔會喺呢日發動大攻勢，再睇睇佢今次出馬數目，嘩，差不多成20隻，如果佢唔係想連場出擊，使唔使派出咁多馬。

　　今日10場賽事，大摩有6場出馬多過1匹，其中在第二、五及六場，仲出到3或4隻，未跑已經贏盡聲勢，再者，大摩啲馬又真係好有分量，今日應該有三兩場落袋。望清楚摩廐馬配搭，好多實力馬畀晒貝湯美，而呢位騎師今日好似摩廐主帥一樣，7匹坐騎之中，除咗頭場「名駒」係來自苗禮德，其餘全部係大摩供應，所以，今日呢對組合，將會係出擊重心。

　　貝湯美6匹摩廐坐騎，差唔多隻隻好料，譬如「共創美好」、「綽力之城」、「步步友」、「首席」，唔少係啱啱贏完或上名，有咁多子彈在手，佢一定會特別賣力，以報答大摩關照。

　　而咁多隻裏面，阿Jack對於第三、六場「共創美好」及「步步友」最like，超班馬新勝猶勇，只要唔係畀加程累到，不難再捷，所以，唔好介意賠率熱，勝在夠堅。(借題發揮 Jack)