葉楚航盡顯「心意」

猪拉多纳

　　呢排不停見到蔡約翰馬房作出猛烈攻勢，依家已經有21場頭馬，我哋可以話佢殺得性起，但係長路亦有盡時，唔會期期係得佢做主角，正如潘頓長勝之路總有爆煲嘅1日。

　　今次輪到邊個馬房威？會唔會係呂健威？文家良？阿Jack覺得會係葉楚航，淨係睇睇佢今次手馬，數目多唔在講，仲要好有隊形，好多匹都係啱啱有表現，一齊配合同日跑，唔係想一次過搏幾場，又使乜湊出咁強陣容，虛張聲勢為咩先。

　　今次葉廐出馬10匹，「隨心隨意」應該係重心之一，明星馬喎，今季復出那場失威，再跑唔通想再攞架嚟丟一定操到十足十，狀態火紅火綠至會嚟爭盃，戰意信得過。

　　潘頓實搏海嵐一號

　　其次，兩匹新勝馬同樣唔可以睇小，第八場「香港興旺」，畀佢抽到1次排內檔，即刻搞掂，今次又係排埋便檔，繼續由巫斯義騎，只係加重幾磅，唔會忽龍忽蟲啩。第十場「海嵐一號」，上場用莫雷拉爆冷，潘頓應該感到酸溜溜，贏完畀佢騎番，為公為私，實會跑得好好睇睇。(Jack)