620萬華麗登場開齋

猪拉多纳

上季馬會舉行嘅兩次拍賣會銷情雖然麻麻，但一眾P布拍賣馬出到嚟表現又唔太差，近期更陸續上力，頻頻交出頭馬。繼「喜多盈」、「點解」贏馬之後，尋日就輪到三月拍賣會身價最貴，以620萬賣出嘅「華麗登場」開齋，喺韋達胯下以頸位之先壓倒「開心歡笑」，為馬主葉鋼華贏得41萬頭馬獎金。
       
華麗登場在韋達胯下一放到底。
上場前曾發燒致敗

「華麗登場」由沈集成訓練，呢匹澳洲三歲「盡善盡美」嘅子嗣，月初首次上陣跑1000米直路賽，喺楊明綸胯下只係跑第七，但尋日增程跑1200米兼換咗冠軍騎師韋達，就即刻有高水準演出，最終一放到底。沈集成解釋話「華麗登場」上場賽前試過發燒，最終狀態只得四成，結果跑唔出水準，但今場有番八成，加上匹馬慢閘問題改善咗，終於順利打開勝門。