潘頓唔再孭鑊

猪拉多纳

　　開季跑到依家，韋達依然強勢，應該話繼續一人獨大，以前季初冇咁快有成績交出，開鑼頭三數期，唔係未見過佢口糠糠，但目前已贏7場頭馬，近兩期閒閒哋贏三兩場，手風順得好緊要。

　　相比之下，潘頓真係估佢唔到！以為雄心壯志，上季挑戰唔到韋達冠軍地位，今季再鬥過，點知佢一出閘慢半拍，目前4W唔算多，數目與新人田泰安一樣咋，而喺佢手上輸過嘅熱門馬，卻為數極多，好多仲係賣到得十幾廿蚊，嘩，一下子由熱門保衛者變成孭鑊英雄。

　　今日佢老哥騎9場，唔畀番啲顏色我哋睇，真係對唔住粉絲，冇理由咁多坐騎，又係跣人啩？如果又係熱倒連場，形象進一步插水，相信佢自己都唔會自毀城牆。

　　奇無極落雨仲爽

　　揀兩隻捧場的話，鍾意潘頓第六場及第八場。「奇無極」跑法一味靠放，1檔夾晒，落住雨跑，仲爽。「好靚仔」公認超班馬，對手曳到痺，七八成狀態可能都夠贏。