韋達應樹立好榜樣

猪拉多纳

　　上期講到潘頓老貓燒鬚，上季騎「錦繡河山」惹人詬病，佢對手韋達，上季亦時不時犯上同一錯誤，比較嚴重梗係數到「勁勢」，因為表現未被小組滿意，最終被罰停賽。

　　其實，呢幾年韋達騎馬算係平平穩穩，好少犯大錯，「勁勢」算係污點之一，另外，「歡樂時光」不放而留、末段騎hea，亦係上季受到非議事件。堂堂冠軍中之冠軍，應該樹立好榜樣，畀同行、後輩作為借鏡至，韋達陣上表現應該要比認真更認真。

　　鬼叫佢係騎師十三連冠，已經成為香港馬圈一個代表人物，提到香港賽事，冇人唔知韋達係乜誰。所以，佢一言一行，唔單只係代表緊佢自己，亦與香港賽馬有關。希望韋達今季醒醒定定做人，盡心盡力策騎。