李易達破悶局開心歡笑

猪拉多纳

之前以8W居於練馬師成績榜榜尾的李易達，響尋日沙田壓軸日賽，憑韋達接手嘅「開心歡笑」再響勝鼓，打破超過兩個月頭馬荒悶局。
       
李易達
1.09.54平班際紀錄

追溯李易達上一場頭馬，已經係4月28日勝出「青出於藍」，對於「開心歡笑」今次以半冷門姿態一放到底，達哥認為呢匹馬始終有一定班底，今場強配韋達，由於排檔曳，起初諗住留前鬥後，豈料內疊馬匹步速太慢，畀佢順利切入，就此一放到底，並以1.09.54佳速平咗田草五班1200米班際紀錄，能夠成功為馬主盧銓鏗取得相隔三季以來久違嘅頭馬，總算係有交代。雖然李易達要響嚟緊煞科日贏夠13W達標，機會微乎其微，不過練者開鑼憑「齊勝」先拔頭籌，依家再以「開心歡笑」呢隻意頭馬響壓軸日賽埋齋，總算好頭好尾。