勝利寶石價廉物美

猪拉多纳

尋日頭場新馬賽，勝出嘅「勝利寶石」原本排位入紙配潘頓，不過由於佢做完清除腎石手術後仍未徹底康復，所以易配韋達，據沈集成透露，其實韋達喺報名公布之初，已經搵佢索騎，不過始終潘頓一手操開呢匹馬，所以都係畀番佢跑，無奈後者身體不適，所以成哥第一時間諗起韋達，兩人頭馬一來一回，韋達爭冠軍可以講連運都贏埋。沈集成仲講到呢匹馬由「小橋流水」馬販Jason，代馬主以15萬澳元入貨，咁快交出頭馬，可以講係價廉物美，不過由於身材仲係嫌矮細，所以就會畀佢提早收咧，希望可以趁住暑期，有充足時間畀佢再發育，留番下季發熱發光。
       
勝利寶石
今季新馬賽首匹大熱入圍

而今季舉行咗五場新馬賽，之前四場大熱門都未入過三甲，不過尋日「勝利寶石」就打破呢個宿命，以1.7倍大熱掄元，睇吓七月一日季內最後一場新馬賽千四米，大熱門演出又如何。