方程式終於啟動

猪拉多纳

　　又係落雨跑馬的日子，有時都真係幾愁，度好晒一堆馬買，點知場地受到天雨影響，要重新刨過。另一方面，如果今日冇乜雨，又係煩擾，因為大家可能兼顧好多變化地馬匹，點知場地鬼死咁乾快，方向完全錯晒！所以，有時臨場才擬定策略未為晚。

　　第七場三班1400米草地。「方程式」一連兩場閃閃身跑獲殿軍，前仗1400米如是，上場短至谷中1000米一樣係咁，呢匹自購馬能力漸漸「樣」出來，睇落插三班好快有得贏，亦唔會係呢班可久留。今次出動到柏寶，又在配備及路程上作出變動，唔係想求勝，方仔大不了繼續安排此馬跑谷草都得，睇心意呢場會係落點所在。

　　第九場三班1650米泥地。「大有作為」屬今季演出極出色馬匹之一，不得不讚阿航，有本事將呢匹馬保養差唔多大半季，如果有演出穩定表現獎，阿棟一定投一票 ！ 講番匹馬實力，上到三班照贏，證明當打乜都冇有怕！再遇「熱爆男」，隨時再撼低對手。

　　第十場二班1400米草地。「隨心隨意」又係另一阿航武器，睇嚟係配合而來，全日重點之一。跑4場贏3場夠晒準，證明幕後好鬥志，唔會睇賠率做人，呢類馬對於賭仔嚟講係好事，賠率熱唔緊要，最重要肯搏，一博一畀到人極大信心嘛。