煞科日倫敦三雄爭「歐」大混戰

猪拉多纳

熱刺殺貓至有價講

今晚英超煞科，由於冠軍、亞軍同三支降班球隊提前誕生，煞科日嘅焦點落喺決定最後一個歐聯席位身上，目前暫列三、四、五位嘅三大倫敦老牌球會車路士、阿仙奴及熱刺將要咬埋最後一啖氣，分途出擊爭奪殺入前四名，進軍歐聯。倫敦三雄發惡，勢掀一場大廝殺！

排第五位嘅熱刺除咗要主場擊敗「黑貓」新特蘭之外，仲要阿仙奴失分，先至可以打入前四，形勢較為被動。不過來到最後一戰，都唔諗得咁多，最緊要做好自己，踢一場漂亮勝仗謝幕，即使最終功敗垂成，向球迷都有交代。新特蘭護級成功等抖暑，另有三大主力缺陣，更難抵擋熱刺猛攻，直取「讓球主勝」。
玩歐聯至留到巴利仔

爭前四參加下屆歐聯，對熱刺有雙重意義，一來涉及數千萬鎊收入，二來關乎能否留住首席球星加里夫巴利，領隊保亞斯有滿腹大計，話想請前英格蘭國家隊助教巴甸尼出任技術總監，負責收購球員事務，目標直指巴塞射手韋拿，此番言論都係想證明有決心令球隊更上一層樓，希望加里夫巴利留隊。巴利仔季尾續勇，加上艾迪巴約翻生，要攻陷新特蘭大門，並唔困難。

「黑貓」新特蘭護級目標已完成，可以鬆一口氣，鬥心大不如前。加上「黑貓」人腳不整，射手施斯隆同中場格力加特拿停賽，左閘丹尼路斯屬於熱刺借將唔准倒戈，淨輸兩粒屬最低消費。
煞科日三大戰

紐卡素 Vs 阿仙奴

有線200及300台

車路士 Vs 愛華頓

有線64台

熱刺 Vs 新特蘭

有線301及201台

全部周日晚11時直播