紅魔劏鵝歡送老費

猪拉多纳

今晚英超曼聯主場對「天鵝」史雲斯，除咗係領隊費格遜喺奧脫福主場嘅告別戰，賽後紅魔亦會進行捧盃儀式及勝利巡遊，老費在曼聯地位崇高，如今光榮退休，眾將都想用一場勝仗歡送佢老人家，順便慶祝捧盃，「天鵝」唔會阻人開Party，「讓球主勝」捧得過。
史雲斯唔會搞寸Party

今場不但係曼聯本季主場謝幕戰，亦係領隊費格遜最後一次喺奧脫福主場領軍，意義非凡，眾將希望佢老人家好頭好尾，贏番場漂亮嘅勝仗向在場「魔粉」告別，正係呢份動力，會令球員加多兩錢肉緊比賽，其中射手尹佩斯揚言好感激老費助他一圓冠軍夢，必定拚盡入多幾粒，報答佢嘅知遇之恩。雖然曼聯有艾舒利楊格、韋碧克等傷兵，右閘拉菲爾達華要停賽，但史雲斯亦傷兵滿營，包括攻擊中場米捷，加上老費德高望重，深得如「天鵝」史雲斯主帥米高盧特立等後輩崇拜，今仗亦會識做讓路，唔會搞寸Party，等佢開開心心贏波，於主場畫上圓滿句號，「讓球主勝」不容錯過。