小保加留力明益河床

猪拉多纳

周一凌晨3:30有場好嘢，（日）50小保加將會喺主場同河床爆發阿甲「超級經典打吡」，開咧至今贏得1場咁大把嘅小保加，唔單止傷兵滿營，最慘係要兼顧埋自由盃戰線，教頭比安基限米煮限飯惡唔出樣，平手盤捧河床有So。
收起列基美 法蘭高蘇沙

小保加阿甲開季至今錄1勝6和4負，戰績咁曳皆因傷兵名單水蛇春咁長，最新就有基文迪洛迪古斯加入十字軍行列，教練比安基仲話現階段會重視自由盃多啲，所以為安全計，未來兩輪聯賽都會收起腿筋有輕微撕裂嘅列基美同後衞法蘭高蘇沙，尤其「大哥」列基美雖然操番，但狀態未足，留番下個禮拜四對哥連泰斯場自由盃16強次回合先搏合理啲，可以預期今晚鬥河床個陣應該會弱得幾得人驚。

對家河床上仗同基爾梅斯各一言和，但如果唔係富利斯摩利門前浪費咗個黃金機會，佢哋已經攞晒3分。富利斯摩利賽後畀唔少球迷柴台，不過教練拉蒙戴亞斯就話會繼續搵呢位射手擔正，富利斯摩利為咗報答教練咁信佢，今鋪點都要做番齣好戲交代。