祖記「大」事慶祝打傻豹

猪拉多纳

Plan定勝利巡遊路線

祖雲達斯今晚主場對「傻豹」巴勒莫，和波都夠提前3輪稱霸意甲，但咁唔代表佢哋會揸流攤，因祖記有望打破球會史上最高得分紀錄，而且佢哋連勝利巡遊路線都定埋，肯定想入多幾粒慶祝，捧1.65倍入球大！

（開賽時間：周日晚9:00）
搶分創造球會史上最強

現時祖記領先次席嘅拿玻里11分，即使今場和波，拿玻里跟手又搞掂國際米蘭，雙方依然有9分差距。由於意甲同分計對賽定排名，所以即使以上戰果出現，祖記依然以較佳對賽成績壓倒拿玻里提早3輪捧盃，但講真和波點及主場贏波開香檳過癮呀？

仲有喎，05至06年球季，祖記喺卡比路帶領下以91分封王，假如祖記緊接4場聯賽贏晒，就能夠以92分破紀錄，連金牌教頭卡比路都要行埋一邊。唔好忘記，祖記教練干地仲未續約，扭計要求年薪由300萬歐元加到500萬歐元，想加人工又點會和波捧盃咁衰仔？

其實消息話祖記高層早就預咗今日捧盃，成功嘅話會安排球員坐大巴勝利巡遊，環繞都靈市一周同球迷分享喜悅，跟手大軍會舉行狂歡晚會慶祝，既然巡遊計劃好，當然唔會掃興啦！

目前巴勒莫同倒數第3嘅熱拿亞同分，為咗護級當然要諗辦法入波，佢哋近5場聯賽3勝2和，證明冇打算認命降班，射手伊利錫又連續5場入波，同時亦有後衞文度雲尼養傷，右閘摩根利拿停賽，攻得唔守得好易開入球騷。