齊心皇馬讓得起-2 半力夠殺華拉度列

猪拉多纳

今晚西甲皇家馬德里喺主場迎戰華拉度列，讓到兩球都照撐2.04倍「讓主」。「銀河艦隊」喺歐聯止步之後，除咗教頭莫連奴受盡傳媒奚落，拆艦消息即時滿天飛，邊個走邊個留講到似層層，但點都好啦，咁大回響都因為佢哋係皇馬啫！

（now632台周日凌晨2:00直播）
C朗休息 拉莫斯養傷

最重要係皇馬出局後更為團結，除咗長坐冷板嘅卡斯拿斯繼續發揮領袖精神鼓勵隊友，感激球迷同球隊並肩作戰到最後一刻，喊到豬頭咁嘅沙治奧拉莫斯亦喺twitter感謝粉絲，表示對身為皇馬人感到自豪，足證「銀河艦隊」受傷後變得更堅強。

皇馬今晚返番西甲，馬些路、艾比路亞同沙治奧拉莫斯幾件後防要養傷，C朗又話休息，但面對華拉度列，防守有華拉尼、比比同艾辛已經游刃有餘，預計正選嘅荷西卡利祖同賓施馬喺前線亦夠照。仲係有啲擔心？足智彩今季11次為皇馬開讓-2嘅賽事，9次順利開出「讓主」，咁樣夠信心喇啩！雖然華拉度列冇病冇痛，但今季對住頭6位球隊輸晒，實力所限難阻皇馬大炒重振軍心。