蒙特雷強鋒衝三連冠

猪拉多纳

王者戰再恰拿根亞

邊隊係中北美洲及加勒比海地區王者？聽朝就知道！中冠盃決賽次回合，兩支墨西哥球隊內訌，蒙特雷主場撼拿根亞，首回合0比0，此戲碼屬上屆決賽翻版，當時蒙軍主場贏兩粒奠定勝基，今次再遇腳下敗將信心爆棚，於智利猛料射手漢拔圖蘇亞素帶領下，可贏波連續三年捧盃。

（周四早上10時開賽）

中冠盃由中北美洲，以及加勒比海地區球會參加，屬該地區最高級別球會盃賽，冠軍可參與世界冠軍球會盃。蒙特雷連奪兩屆錦標，上屆世冠盃輕取南韓勁旅蔚山現代打入4強，雖然最後不敵車路士，但踢落實力相當不俗。呢支墨西哥勁旅本屆放棄聯賽，全力爭取做中冠盃「三連冠」，由分組賽起就顯出超班霸氣，豪取7勝1和佳績殺入決賽。除有前薩拉戈薩前鋒、2010世界盃中美洲區外圍賽神射手漢拔圖蘇亞素壓陣外，現役墨西哥國腳迪尼基斯亦弗爆，於8強及4強4場賽事入3球，呢條鋒線夠晒卡士。
主場威力強撐主Ｗ

蒙特雷目前於墨西哥秋季聯賽排名低過拿根亞，但蒙軍主場威力特強，聯賽7戰6勝；而且上屆贏過拿軍稱王，首回合互交白卷，今次主場出擊，心理上勁有優勢，捧主Ｗ正路。今場決賽計作客入球，如果0比0打和就加時30分鐘，加時不計作客入球優惠，再和就射12碼分勝負。