拉科救亡貝城借一

猪拉多纳

今輪西甲壓軸好戲，由護級處於水深火熱嘅拉科魯尼亞作客貝迪斯。喺拉科効力多年嘅箭頭里基，近年對貝迪斯屢有佳作，呢位老將下季極有可能蟬過別枝，佢梗係想好頭好尾，帶領球隊留番喺甲組喇，鬥心毋庸置疑，「讓球客勝」值得捧場。

（now 632周二凌晨4時直播）

自06年從基達菲加盟後，里基早已成為拉科icon人物，拍得住「化石」文路爾柏保路及華拿朗，前季拉科不幸降班，里基面對其他球隊招手亦不為所動，誓要留守協助拉科升班，忠誠之心可昭日月。嚟到職業生涯尾聲，里基決定尋求新突破，有傳佢將會轉投愛斯賓奴，但首要任務係帶領拉科護級成功。
里基專尅貝迪斯

依家西甲榜尾形勢立立亂，就算排第14嘅畢爾包都有機會被拉落水，經過一輪瘋狂搶分後，拉科總算由包尾升上安全線尾四，但其實與尾三薩拉戈薩同分，只係多包尾嘅馬略卡兩分，聯賽剩番六輪，乜嘢事情都有可能發生，因此拉科仍需努力。當然貝迪斯亦非善男信女，上仗作客逼到皇馬有氣冇碇抖，雖敗不辱。拉科近年作客貝迪斯表現唔曳，近六次去到賓尼圖維拉馬連球場比賽，有五次能全身而退，擺明食住對手，加上里基之前三次對「綠白軍」省三粒咁sharp醒，今仗受讓不容錯過。