雷丁搶分焗攻大起紅軍

猪拉多纳

任你個大廚幾有料，但如果啲食材臭嘅，都救唔番碟餸！雷丁人腳曳，上到英超任人魚肉，就算近期聘新帥艾堅斯救亡，但班波仍谷唔起連輸兩場。今輪主場撼利物浦，雷丁為護級將義無反顧喪攻求勝，紅軍前線個個入得，捧大盤。

（有線301及201台周六晚10時直播）

雷丁係本季三支升班球隊中，演出最曳一隊。韋斯咸由頭到尾冇降班危機，修咸頓狠下心腸炒領隊艾堅斯，請來普捷天奴任教，實力更上一層樓，上仗作客雷丁清脆贏兩粒，雷丁級數明顯已比唔上兩支「昔日戰友」。艾堅斯教小型班係有一手，但佢唔係莫連奴，霎時間要執好病入膏肓嘅雷丁，你估真係咁易咩，你睇吓隔籬夏利列納，搞咁耐都執唔掂昆士柏流浪啦！

艾帥督師兩場，先後輸畀阿仙奴同「聖人」，雖然球員士氣唔錯，但整體踢法都係大大腳斬個波入禁區，同以前冇大分別，今輪對利物浦，雖然有主場之利，但都唔會有乜甜頭。不過，雷丁喺聯賽包緊艇，目前距離安全區域8分，依家和波同輸波分別不大，嚟緊幾場睇嚟都會拚死谷上搶W。
哨牙蘇爭射手搏殺

雷丁焗攻，當然就益咗紅軍。利物浦現時齋打聯賽，場場都畀領隊羅渣士演練進攻模式，蘇亞雷斯亦為神射手獎全力打拚。紅軍上仗畀韋斯咸悶和0比0，以佢哋強大火力，今場分分鐘大爆發，捧大盤啦！