熱剌折翼 焗攻冇著「素」

猪拉多纳

歐霸盃8強首回合巴素利作客雖然同熱刺打和2:2，之不過計點數贏晒嘅佢哋，今晚次回合返主場出戰，優勢將會更加明顯，事關除咗有穆罕默德薩拉赫繼續大跳「芭蕾舞」製造攻勢，一對鐵閘刑滿復出亦令防守更為穩健，遇着「折翼」焗攻嘅熱刺，1.75倍平手盤能夠立於不敗之地！

（有線64及203周五凌晨3:05直播）
巴素利一對鐵閘刑滿

巴素利喺白鹿徑球場撳住熱刺嚟打，或者會令人覺得意外，但實情呢隊歐洲賽常客見慣大場面之餘，目前喺瑞士超仲力爭4連霸，實力絕對唔嘢小。當中廿歲出頭、被英國傳媒稱為「芭蕾舞演員」嘅穆罕默德薩拉赫，速度腳法兼備，首回合喺右路話過就過，搞到嘜佢嘅維頓漢一仆一碌，雖然埋門嗰腳差咁啲火候，就連教練穆拉特耶堅都親口承認：「薩拉赫只要有埋入波呢瓣，効力嘅就唔再係巴素利。」不過有佢喺邊路跳住「芭蕾舞」幫隊友鋪橋搭路，已經夠晒煞食。

再者巴素利除咗有馬些路戴亞斯刑滿復出，喺中場擔起掃蕩同控制節奏角色外，南韓左閘朴柱昊同丹麥右閘菲臘迪根亦齊齊坐完波監復出，有番呢對鐵閘鎮守邊路，成條防線即刻完整番晒，想話攻破佢哋再唔係話咁易。
艾朗連儂 巴利齊打柴

熱刺方面，哥爾卡雖然可以彌補中堅加拿斯受傷嘅空缺，但弊在艾朗連儂同加里夫巴利一個傷膝一個拗柴，今晚肯定唔使預佢哋，前線淨係得艾迪巴約獨挑大樑，就略嫌欠缺火力，如今煞食嘅雙翼齊飛都冇埋，喺輸咗兩個作客入球下仲要焗攻，隨時輸埋都唔奇。

首回合：巴客和2:2