QPR韋根生死大激鬥

猪拉多纳

護級戰上齊兵器搶3分

英超今晚上演護級關鍵六分波，昆士柏流浪(QPR)主場決戰韋根，主隊搵老帥夏利列納救亡，諗住佢可靠人情攞分，但今季護級異常激烈，下游球隊自身難保，夏利叔都冇符！護級勢危，今場拎一分冇用，定必擸齊架生狂攻對手，兩隊鬥攻求存，捧大盤最好！

(有線200及300台周日晚11時10分直播)

昆士柏流浪上年十一月尾聘用名帥夏利列納領軍，演出大有起色，曾經作客搞掂勁旅車路士，踏入三月接連擊敗護級對手修咸頓同新特蘭，再現生機。不過，QPR近兩場作客阿士東維拉及富咸輸晒，形勢急轉直下，最慘係一月以貴價收購嘅大舊中堅基斯杜化森巴走晒樣，上仗頻頻犯錯成為罪人，大軍對上兩戰失六球，後防不穩係致命傷，今場要谷前爭勝搶分，對手大把空位打反擊，門將施薩索拉斯肯定有排忙。

踏入賽季最後直路，QPR前線發揮好咗好多，射手雷米證實夠料企穩英超，仲有射得之人泰拉拔在陣，人腳絕對唔曳，佢哋近四場轟入九球，進攻火力勁過唔少下游球隊。
主隊焗攻有利韋根反擊

韋根慣性季尾發力，射手干尼連續兩場尾段士哥成為贏波英雄，佢跑得射得，反擊時作用好大，將成對手心腹大患。今場兩隊都唔輸得，夏利叔冇得再靠人幫手，只能靠自己，佢哋顧得攻嚟守唔掂，預期會同韋根大手交易，入球大值得一試。