告達理智勇福駿壯行色

猪拉多纳

「智勇福駿」尋日喺蔡明紹胯下成功添食，五班馬一口氣連贏三場，成為告廐今季首匹三捷馬，為馬房省靚招牌。大告督完師已經漏夜飛過去杜拜，為「時尚風采」出戰阿喬斯短途錦標打點一切，「智勇福駿」呢場頭馬正好幫倉主壯行色。
       
智勇福駿連下三城，勢如破竹。
三連捷後依然跑五班

講起「智勇福駿」今季有脫胎換骨嘅表現，大告話隻馬嚟香港初期體質弱啲，需要較長時間養好身子，好彩馬主夠晒耐心支持，今季總算有回報。今場起步被撞失咗少少位，但係蔡明紹穩定走勢之後沿內疊空檔逐步推進，結果末段喺千軍萬馬之中殺出重圍，一連三場贏馬都用唔同跑法，證明佢跑法夠晒機動，最正嘅仲係每次贏馬都贏得咁險，逐少逐少加分，估計下場繼續留喺五班，你都咪話唔着數！