費托挽面子車路士摘「星」

猪拉多纳

巴塞隆拿輸兩粒都贏得番4粒躋身歐聯8強，英超車路士喺歐霸盃僅落後區區1粒，今晚返到主場要反勝羅馬尼亞「一哥」布加勒斯特星隊有幾咁難呀？「藍戰士」剛啱喺足總盃8強賽和曼聯有脫胎換骨嘅表現，加上盛傳今夏冇得留低嘅費蘭度托利斯為面子點都要做番齣好戲，1.85倍「讓主」睇怕走唔甩！

（有線61及201周五凌晨4:05直播）

車路士首回合造訪羅馬尼亞輸0:1，星隊會長比卡利賽後寸到飛起，先係話「藍戰士」冇速度，繼而仲踩林柏特隱形添，不過講到最火滾，都肯定非費托莫屬！話說星隊球迷喺首回合好百厭，猛咁用雷射筆騷擾大衞雷斯同「林伯」，但就偏偏冇射「王子」，即係當費托廢o架啫？適逢丹巴巴亞唔符合上陣資格，盛傳季尾即將被清洗嘅費托將會擔正，由佢夥拍桑馬達同夏薩特合組攻擊鐵三角，今鋪肯定搵星隊出番啖氣。
星隊射手尼高歷缺陣

星隊可以話攞梗本土聯賽錦標咁滯，不過佢哋同「藍戰士」嘅級數始終有分野，首回合偷到雞唔等如今晚繼續有運行，況且射手尼高歷仍然受膝傷困擾唔出得，魯爾洛斯古喺前線孤掌難鳴唔慌惡得出樣。再講，車路士剛啱喺足總盃8強造訪奧脫福都省兩粒賽和曼聯2:2，強勢反彈問你星隊點頂？

首回合：車客負0:1