阿爾納沙開攻大吉

猪拉多纳

艾歷臣辛格組星級教練團

亞冠盃分組賽西亞區有個熟悉面孔，C組阿聯酋球會阿爾納沙搵咗瑞典名帥艾歷臣做技術顧問，拍住意國名帥辛格組成星級教練團，但班波頭重腳輕識攻唔識守，今輪會喺主場同沙特阿拉伯勁旅吉達艾阿里鬥入波，投X首選大盤！

（周四凌晨零時開賽）

艾歷臣上年成為泰國球隊泰羅薩薩納技術總監，但玩咗三幾個月就鬆人，今年一月加盟阿聯酋球隊阿爾納沙出任相同職位，名為總監，實情都係同前意大利鋼門辛格齊齊教，佢哋喺意大利球壇有人脈，辛格搵過國腳級射手東尼幫手效果麻麻，前卡坦尼亞老牌射手馬斯卡拉仲有效率，佢哋仲由卡坦尼亞借咗日本射手森本貴幸，衰在幾個外援都係中前場球員，後面得班阿聯酋土炮做防守，勁唔可靠。

吉達艾阿里射手域陀奧利華拉踢過比利時勁旅布魯日，呢個巴西兵超高產，有力撕破對手防線，兩軍鬥攻，必捧大盤！
FC北京有簡路迪折「箭」

同日G組中超代表FC北京主場對廣島三箭，以往日職球隊喺亞洲賽事惡氣十足，但當地經濟唔掂，冇乜資金大搞，令賽事水平不斷下滑，上季聯賽冠軍三箭分組賽首輪主場對住烏茲別克球隊賓約哥就輸埋，表現唔掂，實力見晒底。

FC北京擁有馬里星級射手簡路迪，可以當佢係伊巴謙莫域交晒個波畀佢自己搞掂，三箭後防唔算硬淨，頂唔住對手轟炸，平手盤撐FC北京！

（now 671周三晚7時30分直播）