天鵝擅守 細頂三箭

猪拉多纳

上周日職開鑼戰，上季盟主廣島三箭一比二不敵浦和紅鑽未能打響頭炮，三箭進攻太過倚賴國腳佐藤壽人，一旦佢被釘死前線即刻死晒火，今周作客遇上擅守嘅新潟天鵝，相信係一場入波唔多嘅比賽，阿King推介入球細。

（周六中午12時開賽）
近四次交手全開細

廣島三箭上季以半冷姿態贏得日職冠軍，今季喺冇乜增兵情況下要兼顧亞冠盃，表現似乎有啲吃力，自從贏完日超盃，球隊已經接連不敵賓約哥及浦和紅鑽，下周中佢哋又要作客FC北京踢第二輪亞冠盃賽事，一眾主力隨時搏殘，尤其前線殺手佐藤壽人目標太大，容易被人防範，作客難免會踢得較被動。

新潟天鵝擅長打防守，上輪力戰至完場前一刻才以一球僅負大阪櫻花，球隊始終欠缺強攻本錢，睇番兩軍對上四次交手，總入球全部都在兩球或以下，今場一於繼續追細盤。
串FC東京大宮松鼠

另外兩關心水，FC東京主場鬥柏雷素爾，柏雷素爾同廣島三箭一樣需要應付亞冠盃，唔排除會收起部分主力，FC東京上場落後之下反勝大分三神，贏得極具說服力，今返主場有力乘勝追擊，平手盤捧FC東京。

（周六下午1時開賽）

最後磐田山葉主場鬥大宮松鼠，大宮松鼠上季雖然係護級分子，不過陣中一對斯洛文尼亞孖寶路華高域及隆比真歷有級數，踢日職有超班味道，今季有機會為球迷帶來驚喜，面對上輪只能和波嘅磐田山葉，受讓捧「讓球客勝」。

（周六下午2時開賽）