新帥同球員啱Key 切爾達唔怕西維爾

猪拉多纳

正所謂新人事新作風，切爾達搵咗列仙奴領軍之後唔單止即刻反彈，以阿歷士盧比斯為首嘅一班球員亦都拍爛手掌，話同新帥好啱Key，陣營氣氛咁好兼且護級鬥志鮮明，今晚西甲獨腳戲造訪西維爾絕對有得鍊，「讓球客勝」有2.7倍梗係博得過啦！

（開賽時間：周二凌晨4:30）
搶分護級鬥志贏晒

切爾達家陣排尾三，只係落後第17位嘅薩拉戈薩2分，首要任務梗係想盡快脫離降班漩渦！新帥列仙奴上星期首度領軍，就帶領球隊以2:1砌低CF格蘭納達終止連續6場不勝頹勢，勁好腳頭。中場阿歷士盧比斯受訪嘅時候話，列仙奴好識同球員打成一片，每課操練都攞好多辛酸史出嚟激勵球員鬥志，照阿歷士盧比斯咁講，列仙奴似乎埋晒堆喇喎！

季尾波最講鬥志，切爾達呢個Moment重新撻着，護級前景梗係樂觀啦，反觀西維爾就撻極唔着，自從上年11月底開始，打落13場西甲只係贏得4場，家陣喺積分榜高不成低不就，戰意成疑，讓唔起切爾達。