日乙頭炮飛腳不死鳥鬥「大」

猪拉多纳

大阪飛腳今日喺日乙開鑼日主場對京都不死鳥，「遠藤隊長」孭飛要玩入球大。飛腳今季淪落到踢日乙，好在日本國腳遠藤保仁捱義氣留隊，而且獲新教練長谷川健太任命做新隊長，就算入球大細中位數開到3.5球，都要開入球騷賀吓佢！

（開賽時間：周日下午3:00）

飛腳係上季日職火力最強嘅球隊，降班主要係佢哋後防太曳。今季飛腳有中堅中澤聰太離隊，拍檔日本國腳今野泰幸又會推前踢中場，右閘加地亮亦未好番，咁搞法防守力剩低冇幾多，既然飛腳有王牌射手李安度蒙迪拉留隊，信佢鋒力好過。
「遠藤隊長」孭飛要交貨

最重要係據講飛腳打算向日本足協提出，要求容許遠藤保仁同今野泰幸缺席部分國家隊賽事，等佢哋專心為球會爭升班，兼且中場二川孝廣傷愈復出頭炮點衰得？唔好忘記遠藤保仁係08年亞洲足球先生，放完假叉足電做隊長，係時候交貨！

對家不死鳥有射手中村充孝轉投鹿島鹿角，不過簽到上季喺大分三神大爆發嘅三平和司，火力可能不降反升，而且不死鳥又係後防唔齊腳，後衞染谷悠太同巴查利卡未好番，兩隊有前冇後鬥攻入球大唔難開，相信飛腳會整場好戲氹球迷睇日乙。