看守兩字玩謝車仔

猪拉多纳

領隊就領隊啦，看乜鬼嘢守啫！呢句由車路士「看守領隊」賓尼迪斯喺足總盃對米杜士堡賽後記者會嘅晦氣話，肯定係上周國際球壇嘅金句！「肥賓」發車仔老闆阿布拉莫域爛渣，就再令阿布成為英國甚至世界球壇嘅笑柄，但事實上阿布呢個近年「老細足球」嘅人辦，又真係爭唔落！
老細唔撐點會好過？

阿布嫌棄「車仔福星」迪馬堤奧上季用佢鄉下極品嘅「意式鐵筒陣」，「守」番個歐聯冠軍獎盃返嚟，諗住借車仔今季英超季初出閘銳腳嘅「好藉口」，將唔啱佢胃口嘅「馬蒂露」落鑊，搵個另一歐聯冠軍教頭「肥賓」返嚟，希望可以幫車仔踢出睇得又Win得嘅「華麗足球」，本來就無可厚非，但佢嘅安排就真係好失敗咯！先唔講「肥賓」查實同「馬蒂露」一樣，都係靠好運至贏到歐聯冠軍（當年領軍嘅利物浦先輸ＡＣ米蘭三球追番三比三至射贏12碼），真係唔係咁有料，最慘係阿布實在太小家，當初簽「肥賓」只係畀個唔清唔錯嘅「看守領隊」銜頭佢，正所謂「名不正，言不順」，點做嘢吖！

你做老細嘅都唔全力Support「肥賓」，球迷點會撐佢？球員又點會服佢？自然帶出一單又一單嘅「更衣室風波」，咁隊波又點會踢得好？點會交得出成績吖？

當然，阿布可以話慘得過我錢多，吹咩！但使咗咁多錢，冇成績兼畀人笑到面黃，都係冇癮o架！

波男喺度就奉勸香港啲「老細足球」話事人，真係要引以為誡，咪做「港版阿布」呀！