法蘭克福啞火捱細界

猪拉多纳

德甲獨腳戲法蘭克福主場迎戰慕遜加柏，兩軍實力接近，近期前線同樣啞晒火，今晚碰頭預期會係拉鋸戰，客軍賽前聲明會加強防守，黑柴吼1.88倍細盤。

（有線64及204台周六凌晨3時30分直播）

法蘭克福係今季德甲其中一支最令人驚喜嘅奇兵，以升班球隊身份現居第4位，成績比預期更佳，球隊喺教練艾明費帶領下憑快速反擊踢出悅目嘅進攻足球，不過球隊近況明顯回落，尤其進攻線，隊長兼主力得分人物美亞近期腳風嚴重欠順，已經連續5仗未立寸功，新加盟箭頭拿傑喺對漢堡嘅首度亮相梅開二度一鳴驚人，點知只係曇花一現，之後無以為繼，其餘兩名前鋒奧斯恩同馬莫亞直情欠缺德甲水準，令佢哋近3場聯賽都冇波入。不過，自後防領袖安達臣蘇亞雷斯復出後，球隊防線回穩，又擁有被德國權威網站《踢球者》評為今屆德甲至今表現最佳球員嘅年輕門將奇雲查普把守最後一關，球隊近4仗有3場力保不失，現階段變成一支守強攻弱球隊。
慕遜加柏攻力一樣唔掂

慕遜加柏今季成績下滑，近期狀態亦曳，近6場正式賽事未贏過，近3仗只靠小將艾文尤尼斯入過1球，喺歐霸盃亦啱啱畀拉素踢出局，球隊幾個貴價新兵都唔爭氣，中場格列沙加搶唔到正選位，箭頭盧克迪莊名大於實，今季只入過3球咁大把，教練法夫爾始終無法搵到上季帶領球隊成功嘅馬高列奧斯代替者，今仗雖然強陣出擊，但兩名進攻主力艾蘭高同靴爾文都只係啱啱傷愈狀態未足，法夫爾賽前亦強調今場作客會加強防守，預期今仗入波唔會多。